Cain Adomnain 7-9
Ci atconncatar in árbach, ní acatar ní bad baidiu na bad troighiu leo inda cend na mna for indara burt ocus colann for in burt n-ailiu ocus a lenban for a cich inna collai. (...) "Is boedh ocus is troigh lim-sa suut," ar Ronnat máthair Adamnain, aní atchíu fot cosu-su a chlerchocan! (...) Ced nach promae dún do chlerchecht frisin corp tróach ucut, dús in tathbéoighfedh in Coimdhiu erot?" (...)
Soithis Adamnan fri bretheir a mathar, co rocoruigh in cenn frisin medhiu co tarut crois día baghail dar ucht na banscailli, co n-érucht in banscal súos.
"Uch a mmo Coimdiu mor na n-dulai!" or í-si.
"Ced do-beir uch duit-siu?" ar Adamnan.
"Mo claidbeth i n-armaigh ocus mo chor hi píanaib iffirn. Ni fetur nach síu no tall doneth boidiu nó trocuire immum acht Adamnán ocus Mairei h-úag-ingen ic a gressacht a h-ucht muintirei nime."